Onekińczi kiuniubie, jedińczi ajnyn, eki miń onekińczi (12.07.2012 j.) jiłda ajiryłdy aramyzdan profesor Simonas Pileckis jetiszmiejiń sieksiań biesz jiłyn. Anyn üwriatiuw iszlary ücziuń jazhan bitiklardia, wachtłychłarda. Mień klejm jazma nińdi oł edi adambe. Anyn ücziuń mień bołałam jazma bonun ücziuń, ki eksimiźdie tuwduch bir jiłda. Mień jarym jiłbe aharach andan. Anyn atasy ahacza Awija da biźniń anamyz Niima karyndasz tuwduchbe. Bonun ücziuń ki baszłejdohon ücziuńciu klasadan biź

more »

... birdiań ałtynczy klasaha dieria. Nie ücziuń ücziuńcziu klasadan? Bunun ücziuń, ki mień kałdym ekińczi jiłha ücziuńcziu klasada da Sima mieni kuwdu. Oł baszłady üriańmia jedi jaszar, tiek mień ałty jaszar. Üriańdich esawnyn üriatiuwiuńdia. Oł wachtłarda edi karajłarda artych ułanłar. Biźniń klasada üriańdi ałty karaj: biesz bała da bir taszcza: Zofia Pilecka, Gabriel Robaczewski, Aleksander Robaczewski, Szymon Juchniewicz, Szymon Pilecki da Romuald Firkowicz. Gabriel edi aharach biźdiań da kiop kiuczlurak. Bieszynczy klasany tiugiat'tich Esaw bijliktia. Baszładych ałtynczy klasany anus Esawnyn bijligińdia. Burunhu kiuniubie, tohuzunczu ajda miń tohuz juź otuz tohuzunczu jiłda (1.09.1939) baszłandy ekińczi chałknyn uruszu. Onjedińczi kiuńdia tohuzunczu ajda kirdilar biźniń jergia bolszewikłar. Kajtardyłar biźniń jerni Letuwanyn bijliginia. Oł wachtłarda biź anłamadych, ki kajtardyłar Letuwaha, ki son jabuszturma biutiuń bijlikni öźlarynia. Ałtynczy klasany biź tiugiat'tich Letuwanyn bijligińdia. Nieczyk bart esimdia Sima bar wachtny edi burunhu ürianiuwcziubie biutiuń üwriatiuwiumiuźdia. Tiugiatip ałtynczy klasany oł kabuł et'ti biernia: bitik Letuwanyn prezydenttan Smietonadan, nieczyk jachszyrach üwrianiuwcziugia Wilnianiń jerdia. Urusz wachtynda joch edi bołałmach baszłama da tiugiat'mia üwriatiuwniu. Nieczia üwriatiuwlar baszładych da birnidie tiugiat'miadich. Ałejde kielasi profesor baszłady 28 Wrzesień 2012 Awazymyz Pożegnania